خلطة البرد العجيبة عشان يقولوا عليك شاطر وبتفهم - الكلام موجه للطبيب و الصيدلى مرتكب هذا الفعل
حرام في حق الإنسانية وحق الأجيال اللي جاية لما يجيلك واحد بشوية برد تافهين الصيدلية وتقوم مديله الخلطة العجيبة عشان يقول عليك شاطر وبتفهم ..... :/ (ملحوظة : الكلام موجه لأي حد بيعمل كده سواء طبيب أو صيدلي)
اتسألنا كتير عن الخلطة دي .. فولتارين وديكسا ومضاد حيوي .... ديكلوفين وديكسا ومضاد حيوي ... اختلفت المسميات والمصيبة واحدة ....
يا جماعة الخير البرد ده عبارة عن فيرال إنفيكشن .. فيروس بياخد وقته ويروح ممكن من 3 ايام ل 7 ايام .... يبقا المضاد الحيوي هنا لازمته ايه ؟؟ فين البكتيريا اللي هندي عشانها مضاد حيوي عمال علي بطال ... احنا مبنلجأش لمضاد حيوي إلا لو الفيروس ده اتحول ل Secondary bacterial infection واللي ممكن تظهر علي هيئة سخونية شديدة جداً وإلتهاب شديد في الحلق
وردا عالناس اللي بتقول احنا بندي مضاد حيوي ك Prophylactic from Secondary bacterial infection ... أحب اقول لحضرتك مفيش أي معلومة في الدنيا بتقول إن المضاد الحيوي بيتاخد كوقاية في الحالة دي ... بل في الدول المحترمة بيجربوا كل الطرق قبل ما يدو مضاد حيوي وبيحفزو الجهاز المناعي للمريض بحيث إن هو اللي يتغلب عالمرض ويقوم بدوره .. مبيلجأوش لمضاد حيوي إلا لما تفشل كل الطرق الممكنة .. يعني Last line هو المضاد الحيوي
ويا ريت عندنا بيدي جرعة كاملة .. ده المصيبة الأكبر انه بيدي قرص او قرصين مضاد حيوي ولو حقن بيدي حقنة واحدة وحلو اوي كده .....
فخلونا نقول حاجة للناس اللي لسه داخلين في المجال جديد ... البكتيريا ممكن تقاوم المضاد الحيوي ب 7 ميكانيزمات بدون ذكر تفاصيلهم ... عايز تقول ايه يعني ؟
عايز أقول لحضرتك إنك لما بتدي قرص واحد مضاد حيوي او مبتكملش كورس العلاج فانت كده بتسمح للبكتيريا انها تكتشف طريقة لمقاومة المضاد الحيوي ده وبعد فترة مش هيجيب معاها نتيجة ويبقا ملوش لازمة ؟ ..... فهمني أكتر حضرتك :)
بص يا سيدي بالبلدي جدا ولنفرض إنك بتحارب جيش مكون من ألف فرد ... قتلت منهم 50 وباقي 950 فرد ووقفت علي كده وبعد فترة حصل ما بينكو حرب تاني ... لما تروح تهاجمهم هيكون هما اكتشفوا طريقة في الفترة اللي فاتت انهم يقاوموك ويعرفو يتغلبو عليك .... إنما لو انت ف أول مرة قتلتهم وخلصت عليهم كلهم مكانش حصل اللي حصل وقدروا يقاوموك ...
أول نصيحة بالله عليك لو اضطريت تدي مضاد حيوي ادي كورس كامل يا إما متديش خالص ... وفهم الشخص اللي بتديله الكلمتين دول بالبلدي وهيقتنع بإذن الله .. وانا بعمل كده والله وبيقتنعو .... عشان منضطرش نرجع تاني لعصر ما قبل المضادات الحيوية ويبقا علاج شوية إلتهاب بكتيري أصعب من علاج السرطان ....
تاني حاجة للناس اللي بتقول لما بنخلط المضاد مع ديكسا بتخلي المريض يبقا زي الحصان ... أحب اقول لحضرتك المريض لو يعرف انت بتعمل فيه ايه بالديكسا دي مش بعيد يخنقك ....
الديكساميثازون .. كورتيزون مضاد للحساسية والإلتهابات .... فكرته في دور البرد انه يقلل مناعة حضرتك ... الجهاز المناعي بيروح يهاجم الفيروس ونتيجة المعركة ما بين الجهاز المناعي والفيروس بيحصل شوية حساسية بسيطة زي الرشح مثلا .... ييجي قايم المحترم مدي لحضرتك حقن ديكسا تهبط جهازك المناعي وتخليه ميهاجمش الفيروس عشان خاطر ميحسسكش بشوية الحاجات اللي بتحصل زي الرشح وتكسير الجسم ..... ونسي إنه مع كل دور برد عمال بيحشي حضرتك كورتيزون وانت بتيجي تطلبها بالإسم بعدين ومتعرفش انها عالمدي البعيد ممكن تسببلك ضغط وسكر ..... عشان خاطر بس شوية برد تافهين كان ممكن تتغلب عليهم بأي حاجة مسكنة وتعالج الأعراض وتسيبهم يروحو مع نفسهم :) والمشكلة انها بقت بتتوصف للأطفال بطريقة غبية وعمالين تحشوا الاطفال مضادات حيوية وكورتيزونات بدون داعي ...
(ملحوظة : الكلام مش على مجرد حقنة عشان نرتاح من الهجوم اللي ملوش لازمة بس . بل في دراسات جديدة بتقول ان حقنة واحدة ديكسا ميثازون في بداية دور البرد بتقلل من ال Inflammation and airway obstruction
بس للأسف البوست موجه لغرض معين لإن احنا عندنا بياخدوا الكورتيزون زي البونبوني في دور البرد واللي عايز يتخن بيتحشي كورتيزون ودي جريمة)
فالخلاصة مش أي شوية برد ندي مضاد حيوي وديكسا يا جماعة ارحمو الناس وارحمو المرضي وارحمو البشرية كلها بالله عليكم ... عالجو الأعراض بس ;)
يعني شوية سخونية ادي يا سيدي باراسيتامول او حقنة مسكنة وخافضة للحرارة زي فولتارين .. كتافلام .. ديكلوفين .. رومارين أي حاجة خير ربنا كتير ... لو في شوية رشح ادي حاجة anti histaminic مضاد للحساسية عشان الرشح وحاجة لإحتقان الأنف يا سيدي ولا تزعل ...
عندك كونجيستال فيه باراسيتامول خافض للحرارة ومسكن ... سودوفيدرين مضاد للإحتقان ... كلورفينرامين مضاد للحساسية .. وطبعا مع الأخذ في الإعتبار الهيستوري بتاع المريض وتديله الحاجة المناسبة ... ويا سيدي يشرب سوائل دافية .. ينسون .. لمون دافي ميضرش زي الفل =D ;)
لو كل واحد فكر يعمل كده والله الدنيا هتتغير وتبقا حلوة بس نشغل ضميرنا شوية والرزق علي الله .... والله رزقك هيجيلك هيجيلك محدش هياخد رزقك ... اعمل الصح وافتكر إنك بتتعامل مع الله . وآسف عالإطالة ويا ريت متنسوش الشير للموضوع ده بالذات ;) .. دورنا هو نشر الوعي.
مشاركة من صفحة أطباء تعبانين
أحصل على التحديثات عبر البريد الإلكتروني من
Blue Circle - إدارة السكري
نسب النشويات
تطبيق إدارة السكري
